来源时间为：2024-03-11
作者：西坡
沪语改写、讲述：田耘
文字、语音审核：丁迪蒙
编辑：王乙其
往年——确切个讲是五十年之前——迭个辰光，大家就开始忙勒采购年货唻。
忙，讲讲而已。当时个制度是实行按“大户”“小户”来配年货个，数量浪个溢出效应勿会发生，也就无所谓忙。让还没成年个我勿理解个是，当时归入南北货个、有种叫金针菜个干瘪、难吃个蔬菜，居然也列入“配给”个目录。
记得姆妈烧个年夜饭里有道以烤麸、黑木耳为主要食材个炒素，金针菜勒里向亮过相，而勒勒其他场合，迭个含“金”量十足个“菜”邪气少露面个。
我搞勿懂金针菜为啥要配给，也想勿通为啥要拿酸尖尖、涩搭搭、苦嗒嗒、瘦精精个金针菜烧成功菜，更加勿理解个是，貌不惊人个金针菜里囥勒海个搭炎黄子孙侪有关系个中国传统文化密码。
读过《诗经》个人，一辈子勿会忘记金句“关关雎鸠，在河之洲。窈窕淑女，君子好逑”；也勿可能忘记同为金句个“焉得谖草，言树之背。愿言思伯，使我心痗”。《关雎》个热恋固然刻骨，《伯兮》里向个恩爱更加铭心。
事实浪，《伯兮》里“谖草”个分量，再是顶顶重个，两辈子也勿好忘记。搿当然是《诗经》之后个事体了。
谖草，就是萱草，老老早就拨赋予“母亲”“母爱”个象征意义。孟郊个《游子吟》人们耳熟能详；另外首《游子》也写得勿差：“萱草生堂阶，游子行天涯。慈亲倚堂门，不见萱草花。”萱草个意象邪气清晰。“萱堂”就是指母亲，搿是常识，侬讲是伐？
搿么，萱草搭金针菜搭界伐？当然，萱草别名黄花菜，而黄花菜别名金针菜。
花真正能够成为一道菜个并勿多，绝大多数仅仅是作为点缀。葛么，吃金针菜，吃个是花里向个阿里些呢？相信交关人、包括老吃客侪讲勿清道勿明。简单眼讲，伊是还没开开来个花，也就是通常讲个花蕾，俗称花钮头。金针菜细细长长个样子，说明花蕾大而长。拿花蕾摘下来，蒸熟，晒干，做成功阿拉熟悉个金针菜，尽管搿能个转身并勿华丽，甚至是粗暴个。
“黄花菜也冷脱了”，是国人熟得勿能再熟个俗语。不过，为啥拿黄花菜搭仔赶勿过来了硬劲搭勒一道，好像啥人也没讲清爽过。有人讲，出处是苏轼个“明日黄花蝶也愁”；又有人讲，盛产黄花菜个湖南祁东，摆宴席辰光上个最后一道菜是黄花菜，假使黄花菜也冷脱了侬再慢慢叫来，大家就会得婉转个责怪：“看，黄花菜也冷脱了！”
我勿认为诸如此类个解释有多少合情合理：侪是活人，竟然拿黄花菜看成功菊花，可能伐？小地方个一句冷僻个俗话，竟然让全世界跟牢仔复制、粘贴，可能伐？
其实，上海以及周边个人再是最能体会“黄花菜也冷脱了”个奥妙：勒此地，黄花菜一般作冷拌菜处理。既然黄花菜个“冷”大家侪晓得，葛为啥还要强调“冷”呢？其中就蕴含了层“冷”得勿是一眼眼个概念——忒冷了呀！相当于是雪上加霜啊。
金针菜个气息，勿像金桂埃能浓郁，勿像百合埃能淡雅，勿像香菇埃能奔放，也勿像木耳埃能冷寂。伊身浪有眼霉腐气味却又有眼别致搭异趣，并勿死板，像煞冬眠之后刚刚醒过来个小动物、伸了只懒腰，秀出即将迸发个活力。
几乎没人欢喜金针菜个气味搭滋味，但是伊却是以相当低调个方式渗透到人们个餐桌浪：除脱炒素之外，冷拌金针菜大受欢迎，其他譬如金针菜炒鸡蛋、金针菜焖烧土鸡、金针菜炒腊肉……好像没人拒绝。河南名菜胡辣汤里假使缺少金针菜，就谈勿上正宗；老广用金针菜来炒猪腰，以收和理肾气、安神除热之效……
我吃过种山东包子，具体名字勿晓得，当地人直接叫伊“大包子”，里向个馅头由肉糜、线粉、鸡蛋、香菇以及一眼大葱混勒一道，当然还有金针菜，对我搿种视觉效果偏向单纯清爽个人来讲，忒“烂糊三鲜汤”了，味道倒是真个勿恘。我勒东北、苏北侪吃过加仔金针菜个包子，可见北面一带蛮欢喜搿种吃法个。
过年配给金针菜，是当年做搿桩事体个负责人真个用心良苦？我只好“硬装榫头”瞎猜：金针菜除脱为传统伦理张目，还自带了一个重要个关照——忘忧。没错，金针菜，又名忘忧草。
今年春节，好勿请金针菜上台面伐！
作者：西坡
讲述：田耘
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社
原标题：《金针菜》
